Александр Арапов Цёрань моро

Текст песни "Александр Арапов — Цёрань моро"

Тетянь кудо, нолдамак
Авань кудо, содамак,,—
Рунгом-сэрем совавтса,
Седей оймем оймавтса.
Рунгом-сэрем оймавтса,
Каштан валом потавтса,
Алов-алов комавтса,
Кияксонтень токавтса.
Вай, мерян мон, авакай,
Вай, мерян мон, корьмакай:
Кува ютнинь — а ютнемс,
Косо ульнинь — а ульнемс.
Вай, мерян мон, тетякай,
Вай, мерян мон, тирякай:
Мезе маринь — а марямс,
Мезе неинь — а содамс.
Яксинь латко-луткова,
Ламо ломань юткова,
Олгонь-калгонь сэднева,
Тундонь салы веднева.
Яксинь покш киулова,
Чинь пева, чейбулова.
Яксинь-яксинь — топодинь,
Пицевинь ды лоподинь.
Вай, мерян мон, авакай,
Вай, мерян мон, корьмакай:
Кува ютнинь — а ютнемс,
Косо ульнинь — а ульнемс.
Одксцёраксчим сравтния,
Эрьва козонь правтния,
Верьга-алга ветния,
Пиже чувтокс петния.
Пици сельмсэ ваннымизь,
Кельме валсо валнымизь.
Кувать мейле сэрединь,
Кувать лемем кепединь.
Вай, мерян мон, тетякай,
Вай, мерян мон, тирякай:
Мезе маринь — а марямс,
Мезе неинь — а содамс.
Кумажава грехс совсинь,
Карксамова грехс вайсинь,—
Рудаз нардат — нардави,
Обуцясь — а кардави.
Пурдасть прям — эзь пурдаво,
Пурнынь превть — эзть пурнаво,
Сайнинь канст — эзь кандово,
Сайнинь долкс — эзь пандово.
Ох, килангов кучицян,
Ризныцян ды учицян,
Ох, авакай-корьмакай,
Ох, тетякай-тирякай…
Эх, пурныцян-сэрницян,
Эх, монь кисэ эрицян,
Теде тыненк а ёвтамс,
Теде тыненк а содамс.
Яксинь-яксинь — пачкодинь,
Ансяк ней мон чарькодинь,
Ней мон карминь содамо,
Питненк-сэренк кодамо,
Кодат кить тынь ютыде,
Зяро ойме путыде,
Кодат зыянт печтиде,
Кода эйсэнь вечкиде.
Тетянь кудо, содамак,
Авань кудо, нолдамак,—
Рунгом-сэрем совавтса,
Седей оймем оймавтса.
Рунгом-сэрем оймавтса,
Каштан валом потавтса,
Алов-алов комавтса,
Кияксонтень токавтса.