гр. «Хæхты зæлтæ» (сол. Эльвира Кусова) Хъуыбады

Текст песни "гр. «Хæхты зæлтæ» (сол. Эльвира Кусова) — Хъуыбады"

Сæрдæй, зымæгæй,
Гуыбыр, тызмæгæй,
Йæ кæрцы мидæг,
Ныхасы бады
Зæронд Хъуыбады,
Нæ фæндырдзæгъдæг…

Кæйдæр дзæгъæлзад,
Лæппуйæ баззад
Йæ сау бындурыл…
Кæдæм-иу бафтыд,
Уым-иу фæкафыд
Кæрдзыны мурыл…

Бæгънæг, бæгъæввад,
Ыстонг, уысмæн над
Хуыцауы рæстæй!
Цъыфæй ныррæсыд, –
Хæфсытæ уасыд
Йæ къахы скъуыдтæй…

Бын бауай, иунæг,
Дзыллæтæй иу лæг
Кæй нæ рæвдыдта!
Фæсмон фæкæна,
Мæрдты дзыназа,
Дæу чи ныййардта!..

Дæу урс æхсырæй,
Дæу худгæ-хурæй
Чи нæ бафсæста!
Дæу цардуалдзæджы
Йæ хъарм хъæбысы
Чи нæ ауызта!

Фиййау куы уыди,
Уæд-иу хуыссыди
Тæдзгæ-ыскъæты;
Мит-иу куы уарыд,
Уæд-иу ныззарыд
Къæдзæх лæгæты…

Уæд фос куыд уарзта? –
Фæсал сын ласта
Йæ салд æрчъийæ!..
Йæ зард нæ уагъта, –
Фæндыр ыскъахта
Бæрзбызычъийæ…

Бæрзонд урс хæхтæ,
Æнкъард къæдзæхтæ,
Æгомыг бæлас
Фиййауы уарзынц
Æмæ йын зарынц
Сæ сусæг ныхас.

Слова Коста Хетагурова, музыка народная

«Музыкальная культура осетин» © 2012
¯¯\/¯¯¯¯¯¯¯¯¯
☻/
/▌
/ \